ശാന്തിയുടെയും സമാധാനത്തിന്റെയും, ആനന്ദത്തിന്റെയും സ്ഥാനമായ ശ്രീ ശുഭാനന്ദ ആശ്രമം 1918 ല് ഇന്ത്യയിലെ കേരള സംസ്ഥാനത്തില് ആലപ്പുഴ ജില്ലയില് മാവേലിക്കര ചെറുകോല് പ്രദേശത്ത് ബ്രഹ്മശ്രീ ശുഭാനന്ദ ഗുരുദേവനാല് സ്ഥാപിതമായി. ഒരു ഓല മേഞ്ഞ ഷെഡില് പ്രവര്ത്തനമാരംഭിച്ച ഈ ആശ്രമമായിരുന്നു ആത്മബോധോദയ സംഘത്തിന്റെ കേന്ദ്ര സ്ഥാപനം. ആത്മബോധോദയ സംഘം എന്ന ആത്മീയ പ്രസ്ഥാനം അദ്വൈദ വേദാന്തത്തി ലധിഷ്ട്ടിതമായതും ഒരു ജാതി ഒരു മതം ഒരു ദൈവം മനുഷ്യന് എന്ന തത്വം ഉള്ക്കൊള്ളുന്നതുമാണ്. ഈ ആശ്രമം പിന്നീട് അടിസ്ഥാന സൌകാര്യങ്ങള് വര്ധിപ്പിച് വിപുലീകരിക്കുകയും 2.12.1937 ല് ശ്രീ വി എസ് സുബ്രഹ്മണ്യ അയ്യര് (തിരുവിതാംകൂര് ദിവാന് പദവിയില് നിന്നും വിരമിച്ച് കേരള ഹിന്ദു മിഷന് പ്രസിഡണ്ട് ആയിരിക്കുന്ന സമയം ) ഉദ്ഘാടനം ചെയ്തു.
ആത്മബോധോദയ സംഘത്തിന്റെ അഥവാ ശുഭാനന്ദ ആശ്രമത്തിന്റെ കാതലായ തത്വം എന്ന് പറയുന്നത് ജാതി മത വര്ഗ്ഗ ഭേതമന്യെ, സ്ത്രീ പുരുഷ ഭേതമില്ലാതെ ഏവര്ക്കും ജന്മാന്തര ജ്ഞാനോപദേശം ഗ്രഹിച്ചു നാമസങ്കീര്ത്തനത്തില് കൂടി മോക്ഷത്തിലെത്തി ചേരാം എന്നതാകുന്നു. ഏവര്ക്കും ഈ അനശ്വരമായ ആത്മീയ പ്രതിഭാസം കരസ്തമാക്കുവാനാണ് ശുഭാനന്ദ ഗുരുദേവന് ആശ്രമം സ്ഥാപിച്ചതും തന്റെ ജീവിതം മനുഷ്യരാശിക്കായി സമര്പ്പിച്ചതും.
ധര്മ്മം സ്ഥാപിക്കുനത് വരെ ഈ ലോകം വിട്ടു പോകുകയില്ലന്നും, ശരീരം മാറി മാറി സ്വീകരിച്ച് തന്റെ പരമ്പരകളില് കുടി ലോകാന്ത്യം വരെ വാഴുമെന്നും ഗുരുദേവന് കല്പിച്ചിരുന്നു. ഗുരുദേവന്റെ തിരുശബ്ദ പ്രകാരം, ഗുരുവിന്റെ സമാധിക്കു ശേഷം 12 വര്ഷങ്ങള് കഴിഞ്ഞു ആനന്ദജി ഗുരുദേവനില് കൂടി തന്റെ കര്മ്മങ്ങള് തുടര്ന്നു.